2017夏。 大阪岡山。 Day 5(1) 大阪。 木津卸売市場。 烏冬專門店。 一次又一次的驚喜

小女子就嚟出發去名古屋✈~要在出發之前完成"2017夏。 大阪岡山"的遊記~~

好好好~要快手啲先得喇~!!!

講返正題~~

夏之旅的最後一天又嚟到位於大國町站的木津卸売市場~(本來係昨天嚟既~點知撞正定休日....哈!)

<2017夏。 大阪岡山。 Day 4(1) 大阪。 木津市場定休日?!?。 轉戰黑門市場>

木津卸売市場的不二之選--烏冬專門店  大和  (已結業)

排隊啦喂~好野自然多人排~排隊的不只係遊客  日本人都有~排在我們後面的係一對日本老夫婦~

當日正在落微微雨~烏冬專門店門外放置左雨傘供給客人使用~貼心的服務~

其實烏冬店的旁邊有其他的食肆~e.g. 壽司店、鰻魚飯店~但兩次到訪都只見烏冬店有人排隊

小女子只幫趁過烏冬店~所以唔知道壽司店&鰻魚飯店好唔好食~

但在市場內的餐廳~用料一定新鮮~應該有返咁上下質素!!

之前都介紹過~<大阪 大國町 木津市場 驚喜烏冬 >

家庭式經營的小店~店鋪並不大~只有12個座位

前方係廚房~廚房的玻璃柜放置左新鮮的食材     後方就係客人用膳的地方~

好啦~食物上枱啦~!!不禁又要驚呼:嘩!!!!!! 好大件呀!!!!

呢set咁震撼的係狂人弟的~~等小女子一一介紹下~

首先~有舊大過塊面的牛肉奄列配牛肉汁~~

超誇張~厚厚的玉子包著一層又一層的牛肉~~~配上新鮮的青蔥~連本身唔鍾意食蔥的狂人弟都話好好食!!!

本來以為係牛肉奄列跟白飯~哈!!! 少年人你太年輕喇~~~~~

仲有個咖哩烏冬~!!!!

濃郁的咖哩湯底配上煙煙韌韌的烏冬~

以為只係普通的咖哩湯底烏冬!?!?又錯了~仲有隻大蝦!!!!

介紹完狂人弟的"飽到上喉嚨定set"~到小女子的雞肉香菇烏冬~~

雞肉非常新鮮~好有雞味😂~亦都非常大件~配上特製酸酸咸咸的醬汁~おいしい～～～

烏冬的湯底係小女子最喜歡的柴魚高湯~

香菇新鮮就唔洗講~但點解啲菇咁大粒既呢?? 同隻湯匙一樣大~~唔通中左幅射?!?!

食食下~店員仲伸手遞上一碟野俾我哋~心想: 下?!唔係掛~仲有未上晒?!?!~
原來係"service"呀~老闆送嫁~!!!

係炸帶子呀!!!!😍

完食~!!!

真係飽到呢~~~~

老闆俾左discount~食左咁多野都係3000yen~!!!

新鮮、大件、又抵食~~服務一流!!!店員老闆都十分nice~!!👍👍👍

走的時候~老闆叫我哋下次要再嚟~ 放心~我哋一定會再嚟😊~!!

p.s. 同事剛剛11月尾到訪~大和無開門....門口貼左張告示話會休息一段時間......唔知會休息幾耐呢??

うどん専門店　大和
營業時間：05:00-14:00 (星期三、日、公眾假期及木津卸売市場休息日休息)
Tabelog 參考: https://tabelog.com/osaka/A2701/A270206/27011383/

其實隨著越來越多遊客到黑門市場~被稱為大阪廚房的黑門市場亦漸漸變左質~

木津卸売市場暫時依然保留地道既感覺~

但若然想食下不同的小食🍤、魚生🍣~ 木津市場就唔能夠滿足到你~

木津市場平日以批發為主  但都可以零售~買下乾貨、水果等~

若然想買水果   小女子建議到木津市場購買   因木津市場比黑門市場平好多!!!!而且據說黑門市場的貨品來源就係木津市場~~

咦!?!?呢啲咪係剛才小女子食的"幅射大菇"~~

丫~仲有~木津卸売市場會在每個月的第二個及最後一個星期六的早上舉行朝市~

朝市會有小型拍賣會、試食等活動~除左可以購物之外~亦能夠體驗一下朝市的樂趣~~

若你的行程剛好在第二個或最後一個星期六~不妨早上安排去一去木津市場丫😊

除左市場~市場旁邊有間超級市場~

 貨品都比較巨型~

亦有少量的食品~可以當作手信~

木津卸売市場位於御堂筋線的大國町站~與熟悉的難波站只係一站相隔~

溫馨提示: 去木津卸売市場就要早起!!

下午去到黑門市場都好熱鬧~但若下午去木津市場應該已經關晒門了~~

並且要注意"定休日"呀!!! 免得重蹈小女子的覆轍~~

木津卸売市場
交通方法: 御堂筋線大國町站Exit 1  行3分鐘左右
營業時間: 05:00-11:00(商店)    食肆營業至12:00-13:00不等
休息日: 逢星期日 (除星期日外  週間亦有定休日   請參考官網)
官方網址: http://kizu-ichiba.com/