2017冬。 名古屋。 Day 3(5) 讃岐うどん 野らぼー。 JR Gate Tower 。世界の山ちゃん

當天晚上, 我地繼續在JR Gate Tower的Gate Tower Plaza搵食~

今次輪到食12/F 的讃岐うどん 野らぼー
係小女仔最喜歡的烏冬呀😊

相信好多人都知道"讃岐烏冬"~讃岐其實係四國香川縣的古稱, 而香川縣最出名的美食就係烏冬喇~

所以去四國就一定要食讃岐烏冬!!!但在名古屋都可以食讃岐烏冬既😁

有人話食冷烏冬先至最能夠食到烏冬本身的好與壞, 但小女子都係比較鍾意熱湯烏冬😋

冬季推介~天婦羅炸蠔冷烏冬~

被安排坐入房, 自成一角~

嚟自四國香川縣的讃岐うどん 野らぼー

烏冬的款式唔太多~而熱湯的烏冬更少選擇~

日本的餐廳就係咁~貴精不貴多, 有啲餐廳只係賣一兩款野就可以經營幾十年~

呢點真係同香港好唔同, 香港人最鍾意多花款, 多選擇, 所以香港的餐廳咩都有得食~

豚肉烏冬~

咦?!?點解乾真真既??湯係另上的~旁邊果壺就係湯喇~

但就唔知究竟係湯還是肉汁呢~都幾重味道下~~應該似肉汁多啲~

呢碗係小女子的月見おぼろ烏冬~

配料非常簡單~生雞蛋、海帶、竹輪、蔥花、薑溶、仲有一pat唔知咩野😆

呢pat野果樣唔太討好~睇落有啲似鼻涕😬~

食落去滑潺潺咁~應該係海藻類, 味道就同海帶差不多, 但就比海帶腥少少~

煙煙韌韌的烏冬~可算係小女子食過的烏冬排名前3位!!不愧係嚟自烏冬縣!!👍

湯頭係清甜的柴魚高湯👏👏👏食到咁上下, 就將雞蛋撈入湯裡面, 變成左蛋花湯 (但小女子都係比較喜歡原本的清湯)

配料簡單~帶出烏冬&湯頭的原味道~非常清新的感覺

無肉不歡的狂人弟order左天婦羅炸雞冷烏冬~

果3舊天婦羅炸雞都幾巨型~

天婦羅的粉漿唔太厚亦唔太咸, 外趣內Juicy, 好有雞味🐔😁
日本的炸雞真係好好味👍😋

另外叫左3隻炸蠔, 雖然蠔的size相對之下比較細粒, 但好新鮮, 十分鮮甜~

一邊食就一邊聞到有煙味.....越來越強烈.....唯有快快趣食完走人~

對於有鼻敏感&氣管敏感的小女子嚟講, 香煙味真係好難頂~

每逢遊日, 都好想去居酒屋, 去感受下日本居酒屋的氣氛及品嚐食物~但每次都好掙扎......

若要日本好似香港咁做到全部食肆全面禁煙, 相信都好有難度~~

讃岐うどん 野らぼー (JR Gate Tower)
營業時間: 11:00-23:00 (last order: 22:30)
定休日: 年中無休
官方網址: http://www.norabow.jp/

同場加映~是晚宵夜

是晚宵夜係世界の山ちゃん雞翼呀!!! 

世界の山ちゃん雞翼係嚟到名古屋必食的美食之一~!!!

我地無去到世界の山ちゃん的舖頭食~ 就在名鉄百貨店的分店買左外賣返酒店宵夜~

呢間舖只提供外賣, 就在名鉄百貨本店的メンズ館地下B1層~ 旁邊係出名食千層蛋糕的HARBS

登登登登~!!!幻之手羽先🐔

雞肉嫩滑, 帶有濃烈的胡椒香和辣味, 好惹味!!!

雖然已經凍左, 但都好好食!!! 若然在舖頭熱辣辣咁食, 相信會更加好食~!!!

 好食到我地連續兩晚的宵夜都有食幻之手羽先😊😋

第二晚, 小女子同狂人弟在凌晨時分一同解決左一盒15隻雞翼😆!!! 再一邊睇電視飲埋啤酒汽水🍻, 好正呀!!!

你話丫點可能唔增磅丫~😔