2018夏。 大阪。 住宿篇。 Swissotel Nankai Osaka 大阪南海瑞士酒店。超優越的地理位置

昨天(4/9/2018), 25年以來吹襲日本的超強颱風"飛燕"吹襲關西, 關西國際機場跑道和停機坪遭洪水淹沒, 客運大樓停水停電, 機場已關閉, 未知幾時可以重開...而機場對外唯一聯絡橋遭一艘油輪撞毀, 關西機場變成孤島, 依家靠來往大阪及神戶的高速船疏散旅客到神戶機場, 及利木津巴士有限度服務疏散旅客前往南海電鐵泉佐野駅
居住在兵庫縣的狂人弟朋友, 昨日的居所無電力供應, 昨晚開始恢復正常
呢一陣子~關西一帶接連受災, 地震、暴雨、颱風......
希望市面一切盡快回復正常, 天佑關西🙏🙏🙏

講返正題~

Swissotel Nankai Osaka 大阪南海瑞士酒店位於南海電鐵難波駅的正上方, 進出関西空港都十分方便, 大阪市營地鐵的難波駅亦在附近, 去景點都很便利

樓下已經係高島屋百貨, 附近仲有Namba Park、Namba City等商場, 而行去熱鬧的心齋橋及美食街道頓堀都係5分鐘左右的路程

呢間五星級酒店的地理位置及交通實在太優越, 以致房價一啲都唔平, 但有天竟然俾小女子在網上搵到入住Swissotel Namba Hotel加機票的優惠😍😍😍真係超抵價👏👏👏

因此到訪左咁多次大阪, 我地終於可以住到Swissotel Namba Osaka啦~!!!!

從関西空港搭南海電鐵到達難波駅, 出閘以後行幾步望向左手邊就有Swissotel Namba Osaka 的入口~方便到呢~~~

去到升降機大堂, 搭lift到6樓的大堂lobby check in~

酒店的大堂非常寬敞, 看起來十分舒服~遠處係concierge及酒店的停車處

從呢邊的扶手電梯落去就可以去到高島屋

會先到達高島屋售賣手錶的樓層~

講返酒店大堂, 大型的落地水晶燈係五星級酒店的象徵

 
水晶燈旁邊係coffee shop

凍櫃裡各式各樣的蛋糕&馬卡龍~😋😋😋

聽講印有"Swissotel"字樣的卷蛋蛋糕係酒店的signature甜點

可惜我地每日都早出晚歸, cake shop已關門, 或者已經在外面買左甜品(大阪實在太多美食!!)
留待機會到下次吧~

check in counter~
職員的英文超流利的, 所以唔識講日文都無問題, check in 完已經有職員在旁邊standby幫我地攞行李上樓, 五星級酒店真係唔同啲~

升降機需要用房間的key咭拍一拍先可以按到各樓層

我地入住24樓, 算係中層的樓層

因小女子一家都有鼻敏感, 所以每次訂酒店時我地一定會點選禁煙的樓層
在官方網業見到, Swissotel Nankai Osaka已在2018年3月實施全面禁煙了👏👏👏

我地的房間就在升降機大堂轉右的第一間~

房型係2009年翻新的房間Primer Twins Room 32-34m²

Swissotel Nankai Osaka主要分為尊貴房(Premier)&瑞士優勢房 (Swiss Advantage--2011翻新房型)兩者的差別除左在於價錢和樓層高低以外, 入住Swiss Advantage Room的住客可以免費使用健身房&游泳池我地早出晚歸, 又點會享受到健身房&游泳池丫~所以對我地黎講可唔可以使用健身房&游泳池的分別唔大~我地只係一心諗住用平價住貴酒店😆

好啦~講返間房, 雖然已經係2009年翻新, 但都算係keep得不錯, 房間十分寬敞

床的對面係電視櫃、電視及舒適椅+枱的空間

小女子通常在旅程的第一晚都因會認床而訓得唔太好, 但今次的旅程每晚都一覺訓到天光, 以前從未試過~~~Swissotel Nankai Osaka的床真係好好訓, 應該話好適合我訓😆
真係曾有衝動想睇下係咩牌子的床褥, 可惜最後唔記得左😂

兩邊的牆上分別有兩幅畫, 與房內的傢私做搭配

床頭位置, 有控制房間燈光的控制板~
小女子估計可能係控制板的響鬧功能已壞, 所以酒店放置左一個鬧鐘在床頭~

書枱上有酒店各項設施&服務的收費表e.g. 健身房&游泳池、按摩, 仲有一張Hello Kitty的高島屋優惠咭

另一邊的櫃上就放左收費小食、茶杯、玻璃杯、茶包、熱水壺, 跟一部咖啡機~
櫃下面就係雪櫃, 裡面全都係收費的飲品......

每日有兩枝免費礦泉水提供

呢間房間的唯一缺點--插蘇位極少!!! 嚴格黎講~只有書桌上呢個插蘇位!!!
放咖啡機的櫃上面都有兩個插蘇位, 但果兩個位應該係用於插咖啡機及熱水壺~咁就有3個插蘇位~~~對我地黎講都唔太足夠...叉電話、相機、pocket wifi......下次都係帶定拖把....
唔通2009年翻新的時候無考慮過呢個問題??!?

冷氣的Control Panel都比較舊~

身處酒店的24樓, 望出去係遼闊的美景(唔記得影夜景tim😛)
我們房間的正對面係百貨公司0101, 而0101的拱廊道路就係戎橋筋商店街, 一直行就會通往心齋橋和道頓堀

酒店的正樓下就係百貨公司高島屋,亦可通往商場難波City(Namba City)及Namba Park
而相中的藍色球體係南海電鐵的大型標誌

再來看看浴室吧~浴室的面積都好寬敞下
洗手盆位於外面, 仲有張長椅, 好似梳妝枱咁的設計~

  

所有用品都一應俱全, 風筒都有兩個😆

  

免治馬桶及大浴缸就在洗手盆的裡面~

其實將洗手盆及浴室分開的設計幾好, 兩個人可以分開用, 減免左爭洗手間用的機會

我地主要都係由呢度進出酒店~

從呢度搭升降機

按3樓就會去到南海電鐵, 即係我地第一日到步, 搭特急rapi:d從関西空港到難波一出閘的酒店入口

或按1樓的出入口, 就可前往大阪市營地下鐵、0101百貨、戎橋筋商店街、心齋橋和道頓堀

早餐都好正嫁~!!!食早餐的餐廳位於酒店的頂樓, 環境一流而且食物種類繁多, 味道亦不錯, 值得一試~
(會另開文章介紹😊)

Swissotel Nankai Osaka真係太好的住宿地點, 交通非常便利; 鄰近百貨公司、商場及商店街

房間寬敞, 乾淨整齊, 床褥非常好訓(純粹個人的感受😆); 職員友善服務好, 行過見到都會打招呼
除左房間插蘇位過少的問題😂, 整體來說真係無得輸~!!
若旅遊預算比較多的話, 要在難波一帶落腳, 二話不說立即訂Swissotel Nankai Osaka啦~!!但若好似小女子咁, 就要努力搵下有無優惠喇~😄

官方網址: http://www.swissotel-osaka.co.jp/index.html