中部北陸之旅。立山黑部。大觀峄。黑部平。黑部水庫。扇沢。信濃大町

中部北陸之旅。立山黑部。大觀峄。黑部平。黑部水庫。扇沢。信濃大町

上回提要: <中部北陸之旅。震撼的雪の大谷。富山。立山黑部。美女平。室堂>

觀賞完美麗而莊觀的雪の大谷離開室堂到下一站--大觀峰

由室堂到大觀峰搭乘第三種交通工具--無軌電車

無軌電車會在立山下面的隧道行走所以呢一段路黑漆漆無風景睇

大約10分鐘左右就抵達海拔2316米的大觀峰

到達大觀峰可到車站上面的展望台晀望整個日本阿爾卑斯山脈及黑部水庫的全景

我地無上到去展望台直接去下一站黑部平

從大觀峰到黑部平要搭乘立山空中纜車

立山空中纜車係日本最大的無支柱纜車

纜車的空間算係相當寬敞一次可以搭載80人但人就真係好多

每隔20分鐘會有一班車

車廂內人擠人都幾擠迫但未有推撞的情況
雖然擠迫但一定要嘗試努力行近車箱的兩旁向外望
因為出面的景色真係好似圖畫咁靚簡直係明信片!!

7分鐘過後就到達黑部平

行出去黑部平車站外面可以無遮擋咁欣賞美麗景色

仲可以影返張紀念照可以請在場的工作人員影張專業的唔會強迫購買

亦可請工作人員用自己的相機或手機影

行到累累地影完相入返室內食個包食條香腸再飲返枝酸奶補充下先
呢度亦有手信可以購買

補充左體力後繼續行程

搭乘5分鐘的隧道索道纜車去到下一站--黑部湖即係黑部水庫

呢段的纜車都係階梯狀的索道纜車同由立山到美女平的一樣
唔同的係呢段全程都係地下係日本唯一在隧道裡面行駛的電纜車
建築於地下係因為要保護自然景觀以及防止雪崩

抵達黑部湖車站之後要大約行10分鐘左右就可以行出隧道去到黑部水庫

可選擇乘搭一下日本最高海拔的遊覽船遊覽黑部湖
我地就對遊湖興趣不大遊完黑部水庫就會去扇沢
影底果時刻表就返時間

隧道有清晰的指示唔洗怕行錯路其實跟住人群行就得嫁啦

黑部水庫建在海拔1500米係日本最高的拱形水庫

日本在第二次世界大戰後經濟快速復甦成長

黑部水庫就係為左解決用電問題而開發的水力發電廠

7年的建造過程共花費513 億日圓動員1000 萬人力當中有 171 人在施工過程中殉職

平靜如鏡的黑部湖

每年6-10月水霸都會放水排洪係立山黑部另一壯觀景點

唔知點解湖邊有好多浮木細條

如果你有時間加上體力充沛身壯力健的話可以行220級樓梯上水庫的展望台
在高處眺望黑部水庫

黑部水庫旁邊設有餐廳亦有小小的賣店

時候都唔早係時候食個Lunch 補充下~~

小女子一向唔湊米氣於是選擇左以下呢個味噌湯底拉麵

點知中左伏......

狂人弟今次就醒啦見到身旁果個日本婆婆團 10個有9個婆婆都叫咖哩吉列豬
就跟著婆婆們叫結果真係好食👍

坐近餐廳窗旁位置可以一邊食一邊欣賞美景

食飽飽繼續行程

黑部水庫係我地今次橫越立山黑部的最後一個景點進入隧道往黑部水庫站搭車前往扇澤

開鑿呢段隧道的時候曾經遇到難題令當時開鑿隧道的工程一度需要暫停

因為其中有一段係"破碎帶" 有地下水湧出

在隧道的入口旁可以試嚐破碎帶流出的地下水聽講十分清涼
隧道內有1:186的黑部水庫模型跟住指示行就能夠順利到達黑部水庫站

行行下本來在我地後面的婆婆們突然加快腳步之後仲突然起步跑

心諗:唔通追車?? 我地唔理三七二十一亦無考慮攞返之前影底的時刻表嚟睇

跟著婆婆一齊跑日本婆婆真係身壯力健小女子完全追唔到婆婆😂

跑到我索晒氣終於嚟到車站排隊等上車前面已經聚集左好多人

從黑部水庫去扇澤搭乘關電(關西電力)隧道無軌電車

同室堂到大觀峰一樣都係行駛在隧道內的電車巴士

一次會發4輛電車雖然人很多但我地都能夠順利上車

如果上唔到呢班車睇返時刻表下班車係半個鐘頭後.... 感恩!! 仲要多謝剛才領跑的日本婆婆們👵👍

16分鐘過後我地終於抵達今次立山黑部之旅的終點--扇澤

扇澤站亦設有餐廳及手信店要shopping的要把握最後機會購買立山黑部的獨有紀念品啦

shopping完就可以跟著指示落到去一樓的巴士站搭乘巴士前往信濃大町

巴士途中會經過大町溫泉鄉喜歡泡溫泉的朋友可以考慮住返一個晚上

巴士的車身比較高職員準備左活動的踏墊讓乘客方便上落

扇澤開往信濃大町的巴士車程大約要40分鐘

休息下 40分鐘後抵達信濃大町駅

木造的外觀再加上萬里無雲的藍天

落車後要到面向信濃大町駅的左手邊領回我們今早在富山駅託運的行李
這間就係アルプスロマン阿爾卑斯羅曼館

到埗時剛見到運送行李的貨車停泊在門外

領完行李我地就返回到車站準備搭乘電車前往今晚要入住的松本

就係咁小女子同狂人弟就橫越左富山與長野完成左立山黑部的旅程
利用左六種不同的交通工具一路攀升
慢慢行下買下食下自由行輕輕鬆鬆一啲都唔趕急

立山黑部係可以唔洗跟團嫁!!

希望幫助到想自由行去立山黑部的大家^^

下一篇預告: 中部北陸之旅。松本。開智小學

留言