2018秋。 北海道。 札幌。住宿篇。 札幌三井花園酒店 三井ガーデンホテル札幌 Mitsui Garden Hotel Sapporo

今次係小女子第一次到訪北海道, 加上帶住成村人, 所以一切從最簡單著手

6日5夜的行程, 4晚會住札幌, 中間有一晚住函館

所選擇的酒店都係鄰近JR站, 方便可搭乘JR移動去不同的景點

在札幌, 我地住在離JR札幌駅只係5分鐘腳程的札幌三井花園酒店   三井ガーデンホテル札幌

 (Mitsui Garden Hotel Sapporo)

先講講由新千歲機場出札幌市區~

從機場出市區可搭乘JR快速Airport(快速エアポート), 車費係1070yen/人

若要搭乘指定席車廂 u シ－ト, 就要另加費用520yen/人

車票及指定席劵可在入閘前的自動售票機同時購買

由新千歲機場去札幌只需37分鐘, 途中會停5個站

注意: JR快速Airport列車有啲班次的終點站係札幌, 亦有啲係以小樽為尾站,

若你所乘搭的JR快速Airport列車係以小樽為終點站,記住要在中途站札幌落車呀!!!

到左札幌駅後就搵路行去我地今次入住的酒店--札幌三井花園酒店

基本上從JR札幌南口出黎, 出站後右轉直行, 過兩個紅綠燈就到

從JR札幌南口出黎, 就會見到另一間香港人常入住的格拉斯麗札幌酒店 ホテルグレイスリー札幌 (Hotel Gracery Sapporo)

本來小女子考慮過住呢間, 因為真係非常之方便, 一出JR札幌駅就見到, 過對面馬路就到

但格拉斯麗札幌酒店的房間比較細, 今次因為有長輩同行, 想佢地住得舒適啲, 所以最後選擇左札幌三井花園酒店

前往札幌三井花園酒店唔需要過對面馬路, 只需要繼續往右行

過左第一條馬路會先見到另一間札幌熱門酒店--世紀皇家酒店 センチュリーロイヤルホテル(Century Royal Hotel Sapporo)

世紀皇家酒店的地下有間Family Mart, 方便補給

世紀皇家酒店亦係小女子的選擇之一, 但世紀皇家酒店比較舊而且價錢亦較高, 但聽講世紀皇家酒店的早餐係出晒名的厲害,係日本TOP 10 的早餐,有機會要去試試~

好喇~經過世紀皇家酒店, 過條馬路就到札幌三井花園酒店

好似好遠咁?! 但其實行5分鐘左右就到, 拉埋行李都唔洗10分鐘

若在冬季到訪札幌時, 地面佈滿積雪, 就算5分鐘的路程亦會舉步維艱

雖然札幌三井花園酒店與JR札幌駅之間無地下通道連接, 但有遊人話可利用世紀皇家酒店與JR札幌駅之間的地下通道, 先到世紀皇家酒店, 再行小段地面路段往札幌三井花園酒店

講下酒店的內部環境、設施及服務~

札幌三井花園酒店的大堂並不算十分大, 但都算舒適, 亦有足夠的位置給住客暫放行李

前台職員十分友善, 亦可用英文溝通, 若想預訂當地的餐廳, 亦可請職員幫忙

第4天我地從函館回來再入住, 因未到check in時間就把行李先存放, 職員主動地把我地從函館帶回來的水果放在雪櫃儲存😊

前台旁邊有梳化, 給住客等候及休息

升降機就在前台的正前方, 升降機需要拍房間匙卡先可以使用

升降機旁係酒店的小餐廳, 有免費咖啡和茶可以自己沖來飲,亦係食早餐的地方, 稍後再介紹

酒店有一個小型停車場, 方便自駕遊人士, 我地唔係自駕, 所以無查詢到有關收費

酒店的二樓有一個大浴場，分開男女浴場, 房間匙卡就係浴場"入場劵", 所以在check in時, 職員會分配好匙卡給住客, 女住客的係白色, 男住客的係紅色

(定係調轉呢???小女子的記憶有點模糊😅)

到講下房間~

我們的房間在9樓，訂房時係有要求要禁煙樓層, 但最後俾唔到禁煙樓層我地......話禁煙樓層已經full左.....

一出升降機就已經聞到走廊有頗濃烈的煙味......

咦?!?但房間又完全聞唔到有煙味喎~~好在😙

如果唔係的話, 有鼻敏感的我地就死緊😩

我們入住的係standard twin room 標準雙床房

房間面積有23平方米, 有兩張1,200 x 1,950mm的床, 床褥的軟硬適中,頗舒服~

房間的盡頭位置擺放左雙人梳化及小枱子~
旁邊就係衣櫃, 雖然衣櫃唔太大, 但有不少的衣架, 仲有枝衣物除嗅噴霧👍衣櫃內仲有保險箱

梳化的另一邊就係呢個玻璃櫃, 裡面擺放左茶杯、玻璃杯、茶包、咖啡、熱水煲,
櫃有一層層板可以拉出黎當枱面使用,既美觀又實用👍

床的正前方就係電視的位置, 當然有日本酒店不可以缺少的加濕空氣淨化機

浴室都不錯, 浴室的用品十分齊全, 但就略兼唔太有足夠的空間擺放私人物品

講完房間就講下札幌三井花園酒店早餐~🍳

札幌三井花園酒店的早餐有好幾個選擇, 可以選擇在酒店、鄰近幾間餐廳或是魚市場進食

詳情可參閱房間裡的小本子介紹~ 

小女子就嘗試左係酒店及魚市場食早餐~

若想到魚市場食早餐, 要預早一天到前台購票並預約時間, 會有專車接載來回酒店及札幌中央卸売市場, 稍後再另補文章介紹

酒店進食早餐的地方就在地下升降機大堂旁的小餐廳

用餐時間為6:30-10:00 (最後入場: 9:30)

溫馨提示: 餐廳的面積不大, 食物的擺放位置亦非常集中, 而且8:30過後就開始越來越多人

若唔想同人逼的話就好似我地咁早啲起身吧😀 

小女子所買的package唔包含酒店早餐, 另加早餐承惠1620yen/人

時間尚早, 未有太多人~

食物的種類唔太多, 但就勝在質數, 每樣都好食😋

西式的~

日式的都有~務必要注意呢啲一小格格, 其中有非常新鮮的三文籽及, 仲有明太子、溫泉蛋等等

裝碗白飯就變成三文籽明太子飯啦~👏👏👏

呢個係酒店的餐廳推介~溫野菜

十分新鮮的蔬菜, 只係用蒸熟的烹調方法, 完全食到新鮮蔬菜的原汁原味

小女子食左舊薯仔, 不誇張, 呢舊薯仔係小女子食過最好食的薯仔!!男爵果真是名不虛傳👍

若嫌原汁原味比較淡, 旁邊有鍋咖哩給調味

把咖哩淋在蔬菜上面就變成北海道的其中一樣美食--湯咖哩喇~

沙律區~

麵包區~

飲料區~

甜品及殼物早餐

聽講餐廳所供應的甜品每日都不同, 共有80種的甜品, 每天會有兩款輪流供應

是日有碎朱古力香蕉蛋糕

香橙啫喱~

總括而言, 札幌三井花園酒店的地理位置優越, 鄰近JR札幌駅、地鐵站及札幌巴士站, 方便移動去各個景點

生活基能亦好好, 酒店旁有LAWSON, 行前少少有FAMILY MART, 買消夜小食雪糕完全不成問題

步行就可去到大通公園、北海道大學及北海道舊道廳等景點

SHOPPING就可以到JR札幌駅的大丸、ESTA百貨等商場

房間舒適乾淨, 職員態度親切細心, 樂於幫助住客

若下次再到訪札幌,  札幌三井花園酒店都會在選擇之名單內😉

札幌三井花園酒店 三井ガーデンホテル札幌 
(Mitsui Garden Hotel Sapporo)
官方網址: http://www.gardenhotels.co.jp/tw/sapporo/