初訪東京。 走進奇妙的世界。 Tokyo Disneyland。迪士尼樂園。遊玩心得分享(上)

昨天在全日風雨交加的情況下走遍DisneySea~今日大放天晴🌞🌞🌞
好天氣好心情~一齊暢遊Disneyland吧~!! Let's GOOOOOO!!!

我地住在迪士尼渡假區~所以搭乘迪士尼渡假區單軌電車Tokyo Disney Resort Line前往Tokyo Disneyland Station
若由市區到迪士尼樂園或海洋 可選擇搭鐵路或者巴士~ 

以新宿為例
選擇鐵路可以先坐JR中央線或山手線到東京駅 再在東京駅轉乘京葉線到舞濱駅
大約一個鐘頭就去到迪士尼渡假區
(要注意： 由東京駅到京葉線要行一段頗長的路~)
或可在新宿西口的巴士站搭巴士直接前往迪士尼樂園或海洋

可參閱：http://www.tokyodisneyresort.jp/tc/access/

在迪士尼度假區線"東京迪士尼樂園站"旁邊呢間就係東京迪士尼樂園大飯店 Tokyo Disneyland Hotel
只需徒步一分鐘就可以直達迪士尼樂園   住客仲可以享有15分鐘開園前先入場的優惠
希望下次再訪迪士尼時  小女子有足夠的盤川入住啦~

是日樂園的營業時間為9:00-22:00
我地大約8:30去到~已經人山人海排緊隊等緊入場~

入場啦~!!! 一入到樂園就被門口的復活節裝飾吸引眼球~

好夢幻好靚呀!! 但人都好多... 我地都係先入去玩~離開時再影相再欣賞吧~

好啦~二話不說~去攞張Fast Pass先~第一個目的地係明日樂園

穿過世界市集~往右手邊行就會去到明日樂園

地圖from: http://www.tokyodisneyresort.jp/tc/tdr/about/map.html

第一張Fast Pass緊係要攞~明日樂園最熱門的遊戲--怪獸電力公司"迷藏巡遊車"

攞完Fast Pass~見到唔係太多人排隊~快快去排隊玩返轉先~

半戶外的排隊地方有電視介紹怪獸電力公司係點樣的遊樂設施

怪獸公司係小女子最最最喜歡的迪士尼動畫~嚟東京迪士尼其中一個最主要的目的都係為左玩呢個遊樂設施^^

型仔日本小孩~

BB車停泊處~

終於入到去室內~

嘩~!!室內的裝潢同動畫的場景超級相似!!

怪獸電力公司的接待處呀!!

遊人都不禁停低在接待處前影相~記住影完相就快快趣跟貼返人龍喇~

通往歡笑樓層~

WOO!!排到喇~!!!

就係坐上呢架車~兩個人一部車~車輛座位的前方各有一枝電筒

遊戲的玩法就係在各個場景拎起枝電筒四圍搵有"M"字標誌的地方照照

 用電筒照一照到"M"字標誌~就會有動畫裡面的人物出現

遊樂設施的每一個場景全部都好"真實"~完全好似置身於怪獸公司的動畫之中~

我地瞬間成為左毛毛同大眼仔的同事呀~!!

遊戲的最後有她~同大家講再見~!!

相比起昨天在DisneySea玩的Toy Story玩具總動員瘋狂遊戲屋~怪獸電力公司"迷藏巡遊車"少左點刺激

但遊戲中的動畫場景展示真係100分~!!玩的途中真係好想影低每一個場景~

身為怪獸公司的鐵粉絕對推介!!!

推介指數: 5粒星🌟🌟🌟🌟🌟 (5粒星為滿分)

玩完當然要去放下血~Shopping!!!

好多毛毛呀!!😍😍😍

右圖果隻毛毛超~~級~~巨~~大~~!!

半個人咁大隻的巨形毛毛的身價~無記錯係20,000Yen~

 好多人都會抱起巨型毛毛影相留念~唔知係咪因為咁~巨形毛毛有點味道...

 但小女子當然都有抱起巨形毛毛影相啦~😊

適逢復活節~迪士尼的卡通人物變晒做復活蛋~

毛毛與好拍擋大眼仔米高~

明日樂園除左有怪獸電力公司之外~仲有幾個遊樂設施~

呢個係位於怪獸電力公司旁邊的Star Tours星際旅行: 冒險續航~有Fast Pass提供

Star Tours星際旅行: 冒險續航係類似動感影院的遊樂設施

小女子同狂人弟對Star Tours不太感興趣~直接跳過~

明日樂園又點少得巴斯光年呢~
呢個係巴斯光年星際歷險~都有Fast Pass可以攞

當時唔算太多人排隊~顯示排隊等候時間為30分鐘

我地抱著"唔知同香港迪士尼的巴斯光年有咩分別呢"的心態~滿心歡喜去玩~

結果係~~失望既~因為同香港果個一樣😂

既然香港都有得玩~建議可skip或無咩人排隊時可玩一次~慳返時間嚟玩其他遊樂設施

推介指數: 3粒星🌟🌟🌟 (5粒星為滿分)

 遊樂設施可以唔玩~但旁邊的店鋪係一定要行!!

因為有好多產品都係東京迪士尼獨有~香港迪士尼係搵唔到嫁~

"果隻爪呀~~"

明日樂園仲有太空山Space Mountain(有Fast Pass)、幸會史迪仔、星星火箭

基於剛才玩巴斯光年的"經驗"~我地決定skip左太空山同幸會史迪仔~星星火箭就比較適合小朋友玩~

根據東京迪士尼官網~星星火箭只會營運到2017年10月10日~唔知有咩新遊樂設施取代呢~期待!!

經過星星火箭再行前~就會去到卡通城
卡通城裡面除左有兩個適合小朋友玩的遊樂設施--兔子羅傑卡通轉轉車、艾芝迷你過山車
裡面仲有米奇、美妮、唐老鴨、高飛、Chip 'N Dale的屋企~屋內外的佈置十分精美  可以入內參觀及同卡通人物影相~

但經過時~眼見卡通城超級人山人海!!!! 只好暫時過門不入~

(諗住過一陣再嚟   但最後完全唔記得左😂)

卡通城的旁邊就係最多遊樂設施的園區夢幻樂園
小熊維尼獵物記係夢幻樂園的皇牌遊戲  記住攞Fast Pass  如果唔係就有排等~
聽講裡面的場景同香港迪士尼的小熊維尼係唔一樣既~

相中為何無人排隊?? 水靜鵝飛呢?

因是日小熊維尼獵物記正進行維修保養~小女子出發前已做左功課  知道到訪日小熊維尼唔開放

但因小女子並唔係太喜愛小熊維尼~所以玩唔到都唔太失望    小熊維尼下次見啦^^

要知道各項設施的維修保養日程  可參考: http://info.tokyodisneyresort.jp/tc/schedule/stop/stop_list.html

雖然遊樂設施無開~但都可以去旁邊小熊維尼專門店行下睇下~

小熊維尼的粉絲要大出血啦~!!!

繼續遊走夢幻樂園~呢個係愛麗絲的午茶派對~即係咖啡杯

在旁邊的花叢見到茶煲太太與可愛的阿齊復活蛋~

呢個唔係遊樂設施~而係以愛麗絲夢遊仙境為主題的餐廳--紅心女皇宴會大廳

提供西式的餐點~仲提供兒童餐   一家大細的遊人不妨可以考慮下~

時間尚早~我地亦未太肚餓~都係繼續遊走下先~

夢幻樂園的遊樂設施雖然大部份都比較適合小朋友玩~但呢度的場景真係好夢幻好童話~小女子都好鐘意呢個園區

可愛的小Duffy~

遊走左都一段時間~係時候去搵個遊樂設施玩下~

見到旁邊的幽靈公館只需要排20分鐘   仲唔即刻衝入去玩!!

幽靈公館係另一個夢幻樂園的熱門遊戲  有Fast Pass 提供

起初覺得有點奇怪  為何幽靈公館會身處於夢幻樂園呢??  排隊時仲見到有家長帶同2、3歲的小朋友排隊~

其實裡面唔算係鬼屋~只係好似遊戲的簡介所講：有啲比較恐怖的迪士尼人物出現~(係邊個?大家入去睇下就知嫁喇😝)

 但成個遊玩過程都係處於黑漆漆的環境再加上音效~小朋友其實係會有啲驚...

我地玩的途中~聽到前面架車的日本媽媽不停同小朋友講："大丈夫!"   去到後半段聽到後面傳來小朋友的喊聲

我諗日本的媽媽們可能想藉此訓練小朋友的膽量😂

玩完幽靈公館出到嚟~見到好多人開始在路上聚集~坐在路旁   工作人員亦已拉好繩~ 

點解??  因為就嚟到巡遊的時間啦!!!

快快步~行去旁邊的動物天地攞個Fast Pass先

動物天地只有2個遊樂設施~分別係飛濺山同埋海狸兄弟獨木舟歷險
飛濺山又係一熱門遊樂設施~記住攞Fast Pass呀!!

 飛濺山Fast Pass到手~!!快快步搵個靚位睇巡遊喇~!!

復活節Special~!!日間遊行表演"兔耳蛋大脫逃!"

復活節彩蛋工廠出包了！大批意外誕生的兔耳蛋東逃西竄，使得迪士尼明星也換上了捉蛋師的裝扮，紛紛使出看家本領來捉蛋。 　　

一段熱鬧逗趣的追捕劇，將在這場今年首度登場的全新遊行表演中展現迪士尼明星與兔耳蛋互動的可愛模樣，並於遊行路徑掀起一連串歡樂旋風。 　　

歡迎您前來協助迪士尼明星尋找頑皮的兔耳蛋，度過充滿驚喜、不同以往的迪士尼復活節！

👆東京迪士尼官網介紹👆

巡遊表演未開始之前~有些表演人員會先出場抄熱現場氣氛~佢地會教觀眾一啲動作~一陣同巡遊表演配合~
巡遊表演開始啦~!!
隨著輕快而歡樂的音樂~色彩繽紛的巡遊花車跟著出場!!

首先出場的係戴著兔仔耳的布魯托~ 花車上面有好多好多隻兔耳蛋呀!~

 P.S. 兔耳蛋係東京迪士尼在2017年復活節的新角色

之後就到米奇登場~!!

米奇已經捉到幾隻兔耳蛋了~

復活節又點可以無兔仔呢~

迪士尼的兔仔角色~當中有小熊維尼的朋友瑞比、在愛麗絲夢遊仙境攞住時鐘的兔仔先生等等...

Chip 'N Dale著住醒目的裝束帶埋網去捉兔耳蛋~

巨型兔耳蛋~

到美妮出場啦~!!

美妮: "等我睇下啲兔耳蛋去左邊先~"

唐老鴨Donald呀!!😍

幫兔耳蛋小姐洗頭??

原來係黛絲同嘉拉貝兒Clarabelle的理髮店~

仲有Chip 'N Dale的朋友仔克莉絲Clarice

接住係高飛的花車同仔仔麥斯~

壓軸出場的係"優獸大都會Zootopia"的花車!!!

好驚喜呀!!完全無諗過在巡遊會見到兔仔朱迪同埋狐狸阿力~

朱迪好有型呀!!!但阿力的背影有點頹廢😂😂

"兔耳蛋大脫逃"的巡遊表演真係好精彩~!!整個氣氛十分歡樂!!

日本人的投入程度真係唔講得小  話說小女子一邊在欣賞巡遊時~一邊聽到旁邊的遊人跟著唱巡遊的主題歌曲   

而重點係旁邊果個係一個高過小女子個半頭的日本中年男士!!!!!迪士尼歌曲的感染力真係好強~!!!

(其實打緊呢篇blog的時候~小女子都哼著呢首歌😝)

睇完精彩的巡遊~又係時候返返去明日樂園利用今早一入園攞的Fast Pass玩多轉怪獸電力公司"迷藏巡遊車"

待續~ 

初訪東京。 續。 走進奇妙的世界。 Tokyo Disneyland。迪士尼樂園。遊玩心得分享(下)