2018夏。 大阪 。 廣島Hiroshima: 廣島平和記念資料館。 平和記念公園。 原爆圓頂館
到訪廣島, 不得不去原爆ドーム (原爆圓頂館)
講返少少歷史背景先~
第二次世界大戰, 日本偷襲美國的軍事機地珍珠港~驅使美國正式加入戰爭, 最終美國分別在1945年8月6號向廣島投下原子彈, 再在3日後向長崎投下另一枚原子彈而逼使日本宣佈無條件投降, 結束第二次世界大戰
小女子幾年前去過長崎, 今年就去埋廣島 (咦!?!?好似無寫到長崎的遊記喎...有機會寫返😁)
到訪呢兩個城市, 都有點傷感的情緒, 縱使可以話係因日本偷襲美國而最終承受惡果, 但不竟人民係無辜, 數以十萬計的人民就無辜地成為犧牲品......仲有原子彈遺下的幅射禍害更係不能想像...原子彈的威力實在太可怕
到訪完日本三大景之一的宮島後, 就出發去廣島平和紀念公園
先搭JR渡輪返回宮島口
再搭JR去到JR廣島駅, 出閘後就要往北口方面行, 因為我地要去搭觀光巴士
若搭路面電車就在南口出~路面電車就搭2或6號電車
無論係搭廣島市內觀光循環巴士或者路面電車
前往平和紀念公園都係在"原爆ドーム前"或"平和公園前"下車
廣島市內觀光循環巴士共有3條線, 因為3條巴士線都會經原爆ドーム前駅及廣島駅, 所以就搭邊條線都可以
可到巴士站旁的交通案內所攞巴士地圖
持有JR Kansai -Hiroshima Area Pass的遊客, 可免費搭乘廣島市內觀光循環巴士
但JR Kansai -Hiroshima Area Pass不包含路面電車車費, 所以我地選擇搭觀光巴士😁
觀光循環巴士有關網址: http://www.chugoku-jrbus.co.jp/teikan/meipurupu/
10分鐘左右就到達広島平和記念資料館 (廣島平和記念資料館)
記念資料館的本館正在進行耐震工程, 暫停開放~
我地就去東館East Building
入場劵: 大人-200yen, 高中生--100yen, 中學生以下--免費
200yen一個人都幾抵睇喎~每人仲有一張明信片送tim~~
由展館的最上層開始參觀~展覽由原爆前的廣島開始~
進入沉重的1945年8月6日......
一個原子彈令到一個城市瞬間變成廢墟
顯示器顯示原爆前、發生原爆及原爆後的廣島
估計有140000人因此而死亡
1:8的原子彈模型
左邊的係投擲在長崎的"胖男孩fat man", 而右邊就係投擲在廣島的"小男孩little boy"
原爆前後的原爆圓頂館模型
呢一部分的展品係可以觸摸的, 除左讓參觀人士用視覺看到原爆的威力, 亦令大家可用另一個感官感受下
展館的2樓展廳介紹廣島的發展歷程
可使用輕觸式屏幕認識廣島不同時期的歷史~
去到展館的1樓, 展示出一件又一件令人震憾、觸目驚心的展品...
停留在原爆發生的時間.....
B1層的"新着資料展"展館擺放著市民新捐贈出來有關廣島原爆的展品
其中一個出入口的旁邊擺放著呢個時鐘, 呢個時鐘叫做"地球平和監視時計"
上面的數字顯示著距離廣島原爆事件已經有26589日, 而下面的"00263"則代表全球最後核實驗發生在263日前~
而最後核實驗發生在北韓
希望呢個世界唔會再有核武, 唔會再有戰爭🙏🙏🙏
廣島平和記念資料館
開館時間: 3月至7月, 9月至11月: 8:30-18:00
8月: 8:30-19:00 (8月5、6 日20:00閉館)
12月至2月: 8:30-17:00
入場劵: 大人--200yen, 高中生--100yen, 中學生以下--免費
廣島平和記念資料館官方網址: http://hpmmuseum.jp/
離開資料館, 我地就行去旁邊的平和記念公園
平和記念公園裡擺放左不少記念原爆事件及象徵和平的雕像
原爆之子像
由日本藝術家菊池一雄及池邊陽設計
雕像的頂部係因辐射中毒而得白血病去世的佐佐木禎子雕像, 她頭頂著一隻由鋼絲做的紙鶴
佐佐木禎子死前曾决心要折出一千隻紙鶴, 因為日本人相信折出一千隻紙鶴可以實現一個願望
她的願望係希望世界唔會再有核武器
原爆之子像旁邊懸掛著很多和平紙鶴
由平和公園一路沿著河邊行, 就會去到原爆ドーム(原爆圓頂館)
原爆圓頂館, 原本係廣島縣物產陳列館, 由捷克建築師所設計, 正好處於原爆的中心點,
因為係鋼筋混凝土結構, 係原爆的中心唯一無傾倒的建築物
因為係鋼筋混凝土結構, 係原爆的中心唯一無傾倒的建築物
依家變成左和平的象徵, 在1996年已經被聯合國教科文組織訂為世界文化遺產
聽聞在相生橋上係眺望原爆圓頂館的最佳角度
近角度觀看呢棟在原爆中心點唯一無傾倒的建築物
去睇完原爆圓頂館, 我地就搭乘觀光巴士返回JR廣島駅
一場黎到廣島, 無理由咁快就返返去大阪, 起碼食埋個晚餐先啦~!!!
如果要求唔太高, JR廣島駅的商場都有不少的選擇
如果要求唔太高, JR廣島駅的商場都有不少的選擇
我地就揀左呢間居酒屋
在廣島緊係要食廣島蠔啦~!!狂人弟就話好新鮮好抵食, 所以叫完又再叫, 總共食左5隻~!!!
"食5隻生蠔好少啫", 但我地午飯先在宮島食左全蠔宴喎~~即係狂人弟一日食左11+5=16隻蠔.....
一日食咁多蠔, 個腸胃頂唔頂得順嫁, 所以要制止~!!! 否則有咩事, 之後點繼續行程呀~!!
若唔係制止佢, 唔俾佢再叫, 佢會繼續食....
小女子一向唔特別喜歡食蠔, 生蠔就更加唔會食, 所以我no comment~~
但我食左魚生, 每種都係非常新鮮的~!!!
小女子最欣賞下圖左下角的火炙鰹魚, 新鮮的鰹魚外層表面用火槍炙過, 使魚肉微熟, 一次過有兩種口感, 再加上少許檸檬汁, 使魚味提鮮👏👏👏😋
呢間居酒屋的食物都有返咁上下質素, 價錢亦實惠, 大家不妨試試😊
食完個豐富的晚餐之後, 我地就搭新幹線返回大阪~結束宮島廣島一天遊~
一日遊宮島+廣島會唔會好趕急?? 又唔會喎~
去宮島睇海中大鳥居、食廣島蠔的全蠔宴、行商店街、買手信、到訪廣島平和記念資料館、觀看原爆圓頂館, 要睇要食要買要行的我地都做齊, 所以係絕對可以由大阪去廣島即日來回的~!!!! 當然要好好利用JR PASS 啦~!!!
(我地今次係用JR Kansai -Hiroshima Area Pass)
(我地今次係用JR Kansai -Hiroshima Area Pass)
.jpeg)
留言
張貼留言