2018秋。 北海道。 小樽。小樽運河。堺町通り商店街。六花亭美味泡芙

小樽, 相信係每個遊客第一次黎北海道都會黎的地方~

新千歲空港就有JR快速エアポート号前往小樽, 車程大約係1個鐘零15分鐘

由札幌出發前往小樽都只係搭40分鐘左右的JR, 交通非常方便

小樽駅的旁邊就有食海鮮的三角市場, 先去品嚐美味鮮甜的海鮮, 食飽飽再行去小樽運河欣賞美景或者遊下船河, 再去堺町通り商店街逛街買手信, 夜晚仲可以到天狗山睇夜景, 半天至一天的行程就搞掂喇~!!!

上回講到: 我地去左三角市場食美味的帝王蟹及海鮮丼

<2018秋。 北海道。 小樽。三角市場。 武田鮮魚店。 超級美味的帝王蟹>

食飽飽後我地就散步去小樽運河及堺町通り商店街, 繼續我地在小樽的行程

由市場(即JR小樽駅旁)行去小樽運河並唔遠,大約係10分鐘左加的腳程

途中會經過北海道最初的鐵路--手宮線的遺址

(圖中的兩個大陸/台灣遊客影左勁耐都願唔走......)

再行多5分鐘左右, 就見到小樽運河遊船

可坐船遊覽小樽運河

小樽運河遊船的售票處

運行的日子可能會每年不同, 大約4月底到10月底左右; 運行的時間每天都有點不同
詳細可參考小樽運河遊船的網站: http://otaru.cc/

遊船費在日落前及日落後有所不同~ 日落前: 1500yen/大人, 日落後: 1800yen/大人, 小學生的費用就一樣都係500yen

小樽運河旁的建築物外牆種左紅紅綠綠的攀爬植物

行人路旁的牆身就有有關小樽運河的介紹

小樽運河旁有個小樽運河食堂, 聽講裡而有幾間餐廳, 食物都不錯吃, 但我地剛剛在三角市場食完海鮮大餐, 就略過食堂吧~

行完小樽運河, 我地就步行到堺町通り商店街

除左小樽運河之外, 商店街就係小樽最人氣的景點, 遊客們都集中在商店街逛街、購物

商店街商店的外觀大多保留左從前的建築, 正如下圖在商店街入口不遠處的大正硝子館, 從前叫係一間叫高三郎的商店, 店內的裝潢係新穎的

行入店內再行返出去大街, 就有點不斷在兩個時代穿越的感覺, 呢個亦係堺町通り商店街特別之處

好美的建築物--小樽浪漫館~

浪漫館主要售賣玻璃類的製品,呢個corner係小女子的至愛--貓頭鷹😍

大正硝子館本店

除左購物外, 商店街美食亦唔少, 尤其甜品特別多, 啱晒喜歡食甜品的遊人

北海道出名的芝士蛋糕專門店--LeTAO

在商店街的街尾仲有一間LeTAO, 果間有堂食的位置, 可以坐底慢慢嘆下午茶~

呢度都有史努比茶屋~記得之前到訪九州的由布院都見到有一間~
史努比茶屋已經在日本越開越多間, 原來日本人除左hello kitty之外, 都鍾意史努比~

北一硝子三號館~全條街有好多間賣玻璃製品的店舖, 不竟小樽出名玻璃製品

超人氣的六花亭--最人氣的產品一定係葡萄乾奶油夾心餅乾, 但小女子一向對葡萄乾唔太大興趣

小女子的著眼點係在六花亭2樓售賣的泡芙~!!!

六花亭的泡芙超級好味, 但因為需要冷藏, 所以就只可以堂食~90yen/個

堂食除左泡芙之外, 仲有另外兩款甜品--軟雪糕(300yen) & 芝士三文治(200yen)

芝士三文治就真係非常芝士~鍾意食芝士的朋友應該會好喜歡, 但小女子覺得好膩

泡芙超~~超~~好~~味!!! 堺町通り商店街的必食item~!!!!

在六花亭的旁邊就係另一間人氣店舖--北菓樓

妖精年輪蛋糕及不同口味的米果都係北菓樓出名的產品~

小女子幫趁買左不少的米果做手信及自己食, 當中最喜歡帆立貝及魷魚口味的米果😋

圖後的建築物就係商店街另一間的LeTAO, 呢間LeTAO可以堂食

小女子剛剛先在六花亭食完甜品, 於是就無在LeTAO食下午茶了, 機會就留在下一次吧~

對面有間上樓的どんぐりの森--宮崎駿動畫專門店

小樽音樂盒堂

音樂盒堂門外有個歐洲風格的蒸汽鐘

每15分鐘就會噴出蒸氣, 並且會發出美妙的音樂

其實除左用雙腳去遊覽小樽, 仲有另一個選擇--小樽漫遊巴士
路線有分三條: A(海洋路線)、B(天狗山路線)、C(潮路線), 起點站都係小樽駅前面的中央巴士乘車處
若第一次到訪小樽, 三條路線的必逛路線一定係A(海洋路線), 海洋路線就係會逛到小樽市的精華景點--小樽運河及堺町通り商店街
若時間足夠的話, 可與B(天狗山路線)作配搭，到天狗山上觀賞小樽的夜景
車費:大人210yen/程, 亦可購買一日劵: 大人750yen/程

每條路線的時刻表都有所不同, 詳細的資料請參閱: http://www.chuo-bus.co.jp/sightseeing.tw/otaru_sansaku.php

有關小樽的觀光情報, 亦可參考小樽觀光協會的網站: http://otaru.gr.jp.t.go.hp.transer.com/