2019 秋。北九州。由布院。由布院美食。由布まぶし 心。釜鍋料理。日式煲仔飯??

一講到由布院的人氣知名餐廳, 大家都會即刻諗起主打釜鍋料理的由布まぶし 心

由布まぶし 心 每一份釜飯都係將米飯和醬汁裝在陶鍋裡即叫即製作, 分別有豊後牛、鰻魚及地雞
由布まぶし 心在由布院有兩間店, 一家在金鱗湖旁, 而另一家就在由布院車站前附近的二樓

因碰巧到訪時係星期四, 車站旁的分店休息, 所有慕名而來的遊客都唯有去晒金鱗湖本店......

真係人頭湧湧呀~~!!!

但一場黎到, 又無理由唔試下~~咁就唯有乖乖去排隊吧~

金鱗湖本店

營業時間: 10:30-18:30 (最後點餐: 17:30)

公休日:星期二

駅前分店

營業時間: 11:00-16:00 (最後點餐: 15:30), 17:30-21:00 (最後點餐: 20:00) 

公休日: 星期四

由布まぶし 心的招牌菜式係豐後牛、鰻魚、地雞釜飯 (其實係只有幾樣野食😂)

豊後牛まぶし(2454yen), 鰻まぶし(2454yen), 地雞まぶし(2272yen) (稅拔)

亦可單點炭火燒豊後牛、地雞或鰻魚

在門外排隊, 店員會出來詢問入座人數, 然後再等候店員安排入座

唔好以前只有遊客幫趁, 都有不少日本人食嫁!

在香港出去食餐飯都成日要排隊, 閒閒地都要排成粒鐘

我地等左大概40分鐘, 店員就安排我地入座, 比我想像中快

我地4個人就一人叫左一個釜飯套餐: 2個豊後牛まぶし, 1個鰻まぶし, 1個地雞まぶし

套餐包括有季節前菜、陶鍋釜飯、漬物及味噌湯

跟餐的季節前菜~呢度係4人份~

非常日式的前菜, 雖然有啲唔知係咩黎 (例如: 圖中呢一舊白色的物體),  但食得出食材的原味
小女子最欣賞當中熱呼呼的雞蛋卷~!!蛋味濃厚, 好味~!!都話日本的蛋係寧捨好食嫁喇~^^

麥味十足的由布院啤酒

地雞釜飯 地雞まぶし(2272yen) (稅拔)

查考網上的資料, 地雞在出生28天以後要放養, 而且要有50%以上血統是日本本土的, 先叫做地雞

小女子呢個釜飯的地雞少得可憐, 好似俾人食過咁~~~~同網上的相片&餐牌上面有出入喎~!!!!

雖然份量少, 但地雞食起來肉質很鮮嫩多汁, 滿滿炭燒的香味, 味道十分好~!!!

鰻魚釜飯 鰻まぶし(2454yen) (稅拔)

唔係慣常食開鰻魚的口感, 由布まぶし 心的鰻魚的質感係比較彈牙,有啲似鱔糊的質感> <

小女子覺得鰻魚釜飯可以跳過~~~~😆😏

豐後牛釜飯 豊後牛まぶし(2454yen) (稅拔)

以炭火燒烤的薄牛肉片, 食起來軟嫩唔會乾噌噌, 不錯吃, 但就唔太驚喜

同名古屋的名物鰻魚飯類似, 呢個釜飯都有3食

第一食: 先把陶鍋裡的飯、料及醬汁攪拌均勻, 品嚐原味的釜飯

第二食: 將原味的釜飯加入不同的醬料及醬菜, 增加一點口感及加上風味

醬料有味增、山椒、醬油、柚子胡椒, 亦有提供原本的釜飯醬汁, 小女子點地雞釜飯就會提供地雞醬汁喇~

按著自己的喜好, 加上醬料及醬菜, 製作出不一樣口味的釜飯

網路上最推薦柚子胡椒, 柚子胡椒係大分縣的特產(p.s. 由布院位於大分縣)

在大分縣, 四圍都可以見到有關柚子胡椒的產品, 許多餐廳的食物亦會搭配柚子胡椒, 好多遊客都會買個幾樽返去

但小女子就唔太喜歡, 因為我覺得柚子胡椒太嗆, 會搶左釜飯的原味

小女子就比較喜歡加上醬菜, 再配合釜飯原本的醬汁

咁樣就加強左釜飯的口感, 而又不失釜飯的本身的味道

第三食: 加上第二食的配料及醬汁, 倒入清爽的高湯, 當茶泡飯食

3款釜飯最美味的就係地雞釜飯, 所以我地額外再點左一客地雞炭火燒

地雞炭火燒 (1564yen) (稅拔)

呢客地雞炭火燒應該比剛才的地雞釜飯上的料多~~

同樣有不同的部位, 雞胸、雞脾、內臟, 真係十分美味~!!!

陶鍋雖然睇落去好大個, 其實飯量並不唔多, 大概只裝左1/3左右滿, 大概挖五至六勺小碗就見底, 所以一個人叫一個套餐係絕對食得晒~!!

雖然同香港的煲仔飯係無得相比~, 但一場黎到, 又何妨一試呢~

小女子推薦食地雞釜飯, 若二個人去食, 就一個點地雞, 另一個點豊後牛吧, 鰻魚就可以跳過~

溫馨提示: 大家要預定要排隊的心理準備啊~!!

由布まぶし 心 (金鱗湖本店)
營業時間:10:30-18:30 (最後點餐: 17:30)
定休日:星期二
官方網址: https://www.yufumabusisin.com/