2017夏。大阪岡山。住宿篇。 Courtyard Shin-Osaka Station

2012年第一次去大阪入住的酒店位於心齋橋~之後每次都係住近難波心齋橋果邊
(其實住嚟住去都係果兩間~有機會介紹返~)

今次搞搞新意思~住新大阪!!!是次的旅程我地會"駐紮"在Courtyard Shin-Osaka Station 新大阪站萬怡酒店

先講講地理位置~Courtyard Shin-Osaka Station位於新大阪站的旁邊
在関西空港搭JR大約50分鐘就到達~ 唔需要轉車~

在JR新大阪駅的北面出口方向~亦即係近新幹線的北面出口~

有另一間酒店remm雷姆酒店~正正在與JR新大阪駅共構的新大阪阪急大樓裡面~非常便利~

而我哋入住的Courtyard Shin-Osaka Station 就在新大阪阪急大樓旁

在北口轉左~之後會見到間麥當勞~從麥當勞旁的出口~行過天橋就到了

 從北口到Courtyard Shin-Osaka Station只需要2分鐘!!!非常方便~

唯一的缺點係天橋係露天的~落雨要撐傘~

 

簡約的大廳~

酒店樓高19層~我哋的房間位於9樓

走廊的燈光比較昏暗~而地毯就較軟~拉喼有點困難

房間類型係twin room

設計簡約而帶點現代感~家具以原木色為主調~

2015年7月開幕的Courtyard Shin-Osaka Station係國際品牌Marriott萬豪的旗下品牌酒店
所以與一般的日本酒店不同~房間的空間比較寬敞

床頭位置有控制房間所有燈光的燈制組~床頭燈可調教光暗

仲有插蘇位~方便可以訓係床上~一邊叉電一邊玩手機 😝

 近窗位置擺放左一張超sharp的橙紅色梳化及一個小茶几~床尾位置有張大圓枱~

張枱的size就好似酒樓4人枱咁大~可以盡情買野返酒店開大餐😁

電視係掛牆的~旁邊有放喼的位置

大衣櫃在入口旁邊~衣櫃內仲有夾萬、熨斗、熨衫板

衣櫃旁係小水吧及雪櫃~雪櫃內有要收費的飲品  我哋例牌會將飲品搬晒出嚟~再到便利店或超市掃貨!!

酒店每天都會提供兩枝免費水~

國際品牌酒店的浴室當然唔係一般日本商務旅館的合成版本啦~

浴室的裝潢以黑白色為主~提供免治馬桶及浴缸

亦有提供基本的衛生用品~

小女子喜歡房間的呢個小角落的設計~

一小幅黑白間pattern的特色牆配上橙紅色的梳化~為本來簡約的房間帶來一點的modern感

若要坐新幹線或JR去玩的話~Courtyard Shin-Osaka Station就啱晒你

今次小女子同狂人弟就乘著住Courtyard Shin-Osaka Station之便~搭新幹線去左岡山、倉敷玩一天  非常方便!!!

若要到難波、心齋橋、黑門市場就可以搭地下鐵御堂筋線~

 酒店的周邊比起難波、心齋橋無咁熱鬧~因新大阪並唔係遊客區~早上傍晚會見到上班族趕忙在車站進進出出~

但亦有良好的配套~

鄰近地下鐵御堂筋線新大阪駅有便利店、小型超市--成城石井

有幾間餐廳~

  但格局似food court~~亦似係俾上班族放工飲杯野happy hour的地方~

 而近JR果面呢~3樓有小食店、cafe、手信店~仲有流心芝士蛋糕專門店pablo
可以買手信送俾親朋戚友~

期間限定的宇治抹茶紅豆白玉~仲有6月限定的白桃流心芝士😋😍

上年6月到訪大阪時初嘗白桃流心芝士蛋糕~真係好好食~!!
今次又咁啱撞到正~~點會忍得住唔食呢~~

 若在6月去日本的朋友~記住要食呀!!!

2樓就有daiso 100 yen店、藥妝店、uniqlo、亦有不少的餐廳

有一晚我哋都試左其中一間--京都勝牛 (稍後另有文章分享)

2017夏。大阪岡山。 Day 2(6) 吉列牛。 京都勝牛@新大阪