初訪東京。 尋找Duffy的國度。 Tokyo DisneySea。迪士尼海洋。遊玩心得分享(上)

終於能跳出香港向第二個迪士尼出發!!  

身為迪士尼的鐵粉  緊係一次過要去晒Disneyland & DisneySea啦   第一日我地先去DisneySea  

DisneySea呢邊的建築物少左Disneyland一貫夢幻的感覺  但佈置得非常精緻  好似身處於歐洲某國咁  

海洋的機動遊戲比起樂園果邊係刺激啲   較適合年青人玩  當然亦有專為小朋友而設的設施

唔少得的係DisneySea的主角--大人細路都十分喜愛的Duffy
到訪時臨近復活節    樂園周圍都有復活節的裝飾   好靚呀!!  

出發前要做好功課  因東京迪士尼的受歡迎程度  應該係日本人對迪士尼的熱愛  絕對唔可以看輕

就算唔係星期六日或日本假期   樂園平日都會人潮湧湧

所以要好好利用呢個網址: http://www15.plala.or.jp/gcap/disney/  迪士尼的入園人數預測
左邊紅色格仔係樂園 而右邊藍色格仔係海洋

絕對要避開人數混雜的日子!!   

若樂園擠滿人  每個遊戲都排最少一個鐘先有得玩  都無晒心機玩啦  旅遊的心情都會大打折扣

我地會在11/4去DisneySea  12/4去Disneyland   根據網站的預測  呢兩天的入場人數唔多

但天氣預測11/4會落雨....不過無辦法因只有呢兩日會Full Day留在渡假區....唯有照去!!!

選定好入園的好日期後就係時候買飛喇!!

買入場劵的方式有很多可以選擇:

1) 當天在售票口購買

但比較唔建議呢個方法~~

 因入園的人數很多 已經有很多人持票排隊等入場 若到門口先購買又要浪費時間排隊買飛 會大大延遲了入場的時間

況且如果超過某個人數 樂園會有入園限制 到時只能望門興嘆...

2) 在迪士尼官網購買

將票Print出來  入園當天帶著  唔需要再到園區換實體票  票券上的QR code一樣可以抽Fast Pass

https://reserve.tokyodisneyresort.jp/en/top/
若需要更換實體票以作紀念  可支付200yen換取

3) 在日本指定Disney store購買

請注意!!唔係每間Disney store都有得買入場劵  

請參考: http://www.disney.co.jp/store/storeinfo/ticketcounter.html

 4)在Disneyland Resort 公認酒店購買

因入住的東京灣喜來登大飯店 Sheraton Grande Tokyo Bay Hotel 係公認酒店

  我地係在酒店的樂園售票處購買門票的  有入園保證嫁!

介紹完買飛的方法 就講解下Fast Pass快速通行
迪士尼的Fast Pass唔洗好似環球影城咁另外俾錢購買
只需要去到有Fast Pass的設施附近  將門票的QR code對準機器scan一scan就會攞到Fast Pass
迪士尼海洋共有9樣設施可以攞Fast Pass   

詳情請參閱: http://www.tokyodisneyresort.jp/tc/attraction/lists/park:tds#tags=50

另外可用手機下載迪士尼等待人數的App就可以輕鬆掌握各種遊樂設施的排隊時間及Fast Pass派發的情況
例如: 玩具總動員瘋狂遊戲屋(紅色框框的)Fast Pass已經無晒  依家要等70分鐘先有得玩
而上面的驚魂古塔就要排60分鐘   Fast Pass攞到20:10-21:10 

入園日期: 11.4.2017(星期二)

當天DisneySea的開園時間為9:00   我地早30分鐘去到門口    雖然落緊雨   但已經有唔少人排緊隊等開門

9點正樂園準時開門   人山人海   落住雨撐住傘更加寸步難行    沿路有工作人員舉住牌提醒大家小心地滑唔好奔跑呀!!

大家一入園就向著同一個方向快步走   因當時大家的目標只有一個
抽反斗奇兵Toy Story玩具總動員瘋狂遊戲屋的Fast Pass!!!

跟隨住人潮去到美國海濱即反斗奇兵的所在地附近   工作人員已經拉好排隊線指示大家排隊攞Fast Pass的位置

雖然人多   但秩序良好  大約排左唔夠15分鐘   我地就排到Fast Pass啦!! 抽到可以玩的時間係12:20-13:20

即係話可以在呢段期間行快速通道去玩一次Toy Story瘋狂遊戲屋

抽完一個遊戲的Fast Pass後唔可以即刻抽下一張   Fast Pass會有顯示可以攞下一張的時間  

根據呢張Fast Pass我地要在11:15先可以抽下一張

另外~若35知己良朋同行   只需要派一個人攞晒所有人的入場劵去排Fast Pass就可以   

其他人可以先去排住其他遊戲   分散投資😁

Toy Story玩具總動員瘋狂遊戲屋係DisneySea最熱門的遊戲之一

建議大家入園第一件事一定要抽Fast Pass或直接排隊玩   若在多人入園的日子  大概開園1個鐘就發卷終了嫁喇
無抽到Fast Pass的最少要排超過一個鐘嫁!!

美國海濱除左有Toy Story瘋狂遊戲屋外   仲有另一個有Fast Pass的遊戲--驚魂古塔

位於瘋狂遊戲屋旁邊呢幢奇異的建築物就係驚魂古塔

我地攞完Toy Story瘋狂遊戲屋的Fast Pass   就順路排隊玩驚魂古塔

排隊的人唔算太多  好快已經排到入室內  室內的佈置都幾靚  

華麗而帶點陳舊的佈置營造了荒廢左的酒店大堂情境

行過左大堂會去到類似密室的埸境  但由於條隊行得太快   需要緊貼前面免得阻礙後面的遊人

小女子影唔切相呀😂     咁唯人留返少少神秘感俾大家~~

驚魂古塔其實係類似室內跳樓機的機動遊戲  幾刺激有啲離心力   最驚喜的係升到上某個位置可以望到室外   

推介指數: 4粒星🌟🌟🌟🌟 (5粒星為滿分)

每個遊戲的出口當然係接連放血的店舖
玩完驚魂古塔出嚟見到復活節期間限定的貨品 迪士尼人物的復活蛋造型好可愛呀😍
要注意: 有啲貨品係兩邊園區都有(圖中黃色的) 有啲係DisneySea獨有的產品(圖中紫色的) Disneyland果邊買唔到嫁~!!

我地只係剛入園玩左一個遊戲...血拼未係時候   睇定少少先   免得要攞住重擔一整天😎

(其實係一整天都要撐著傘...   雨未曾停過....) 

暫時離開美國海濱   去到發現港

呢個水上逗趣船   船係跟住水底條路軌行  唔係由玩家自由駕駛   即係水上版馳車天地啦~

小女子對呢個遊戲完全零興趣   再加上落緊雨仲吹住寒冷的強風   就算唔洗排隊都唔會玩囉

不得不讚賞相中著住雨衣冒著冷雨強風玩逗趣船的遊人   好勇敢👍

從前的熱門遊戲4D劇場風暴騎士的位置圍起左板   因為有新的遊樂設施替代

新遊樂設施係Nemo & Friends Searider 已經在2017年5月12日開幕   相信又要大排長龍了

雨不停咁落又大風   吹埋嚟都幾凍    當天已經將最厚的衫同頸巾著晒上身   快快趣搵個室內的遊戲避下雨取下暖先

嚟到失落河三角洲    有個告示版顯示同穿上冒險家裝扮的高飛、米奇、美妮合照的等候時間

有興趣的不妨留意下

我地去左印第安納瓊斯冒險旅程：水晶骷髏頭魔宮避雨😆

呢個遊戲都可以攞Fast Pass     

印第安納瓊斯冒險旅程：水晶骷髏頭魔宮係坐車睇返Indiana Jones電影的冒險場景  但小女子從來無睇過呢套電影   所以無咩共鳴亦無咩期望    去到最後會衝一衝   就係咁喇😂

推介指數: 3粒星🌟🌟🌟 (5粒星為滿分)

在水晶骷髏頭魔宮旁邊就係忿怒雙神   有Fast Pass可以攞

忿怒雙神係木製過山車    據聞有360度轉幾刺激嫁  

點解係"據聞"??   因為當時落緊大雨   我地唔想臨雨濕身   所以無玩到

行去呢個影相位幾溫暖   因為有火~又係時候取下暖😊

行到去阿拉伯海岸  

呢個係茉莉公主的飛天魔毯   即係好似香港迪士尼的小飛象咁  會旋轉每張飛毯會上上落落  適合同小朋友一齊玩

飛毯的門口有大大隻的茉莉公主可愛的寵物兼朋友--老虎Rajah 樂雅

阿拉伯海岸的場景真係好靚呀!!  呢度係以卡通"阿拉丁"作主題的   好似去左阿拉丁果個市集咁呀😊

阿拉丁係小女子喜愛的迪士尼卡通之一    雖然雨未停過但都要係度瘋狂影相📷📷📷

影完相我地排隊玩攤位遊戲   承為500yen一次

左邊紅色果個係將球碌在其中一隻黃色碟上面  一局有5個球

而藍色果個呢係將球推上其中一格的城堡露台  一局有3個球

禮物係Chip 'n' Dale公仔

眼見好多遊人都攞住大公仔走以為好易玩喇~兩個遊戲玩左各一次   點知.....真係技不如人

雖然中唔到公仔   但都有兩隻Chip 'n' Dale襟章作安慰獎

呢隻阿布會郁嫁~條尾會fing下fing下~做佢的老本行--小偷😁

再行過啲會見到呢幢兩層藍色圓頂的建築物   係沙漠商隊旋轉木馬

華麗的建築係2層高的旋轉木馬   除左有普通的木馬之外   呢個旋轉木馬最特別的係有精靈   大家可以選擇騎精靈或騎傳統木馬

之後我地去左睇神燈劇場   有Fast Pass可以攞的

一開始觀眾會圍住中間舞台坐  舞台有個藤籃  有條蛇會從藤籃轉出嚟講一大堆野  

呢Part有啲悶   因為我地唔知阿蛇講緊咩😂

之後工作人員會指示大家去到劇場  劇場表演有現場表演者仲有3D的精靈同觀眾互動   劇場提供3D眼鏡

雖然都係講日文    但藉著表演者的肢體動作同埋3D的鬼馬精靈  大致上都能夠明白表演的內容   表演都算精彩   而且劇場非常和暖~~~

 
推介指數: 4粒星🌟🌟🌟🌟 (5粒星為滿分)

步出溫暖的劇場~換來的係冷雨寒風......

我地都係時候行返去美國海濱   運用今早一入場所攞的Fast Pass   去玩DisneySea最熱門的遊戲玩具總動員瘋狂遊戲屋啦~!!!

To be continued...待續..... 

初訪東京。 續。 尋找Duffy的國度。 Tokyo DisneySea。迪士尼海洋。遊玩心得分享(下)