初訪東京。 續。 Sheraton Grande Tokyo Bay Hotel。 酒店設施

上回講完房間  今篇介紹下酒店的設施及配套

Sheraton Grande Tokyo Bay Hotel位於東京迪士尼度假區內

酒店Check in大堂有銷售樂園入場劵的Counter  住客可購買樂園區的門票並享有入園保證

 酒店的Check in大堂位於2樓   大堂十分寬敞  但開放的counter唔多...

好在小女子check in時唔太多人

counter旁邊有電影區播放著迪士尼的卡通片 仲有遊戲機區

當大人等緊check in/ out的時候  小朋友就可以在旁邊娛樂下  唔洗等到唔耐煩扭計

酒店有提供速遞服務  但好似只限於日本國內😅

重點係--速遞的紙箱有米奇圖案嫁😍

 Check in大堂的另一面係小型商場

 

有Disneystore!! 若在樂園裡而未買夠可以繼續買買買

行到小商場的最盡頭有間類似便利店的店舖   有售賣日用品、紀念品、零食、飲品等等 

價格當然比外面的便利店超級市場為貴  但勝在方便嘛  

就連世界總選第一位的香港代表香辣海鮮味都可以係度買到    但就要310 yen一個😬

我地嘛~~緊係去附近商場的超級市場大量入貨先返酒店啦😆

check in counter的前方有間cafe  日間有麵包、蛋糕、三文治、飲品

晚上仲會售賣一盒盒的炒飯、日式炒麵、日式小菜等等   

有一晚 我地都有買左個日式三文魚炒飯   購買後職員會幫忙翻熱  炒飯的味道不錯嫁!

在樂園盡興過後帶著疲勞的身軀  唔係太想出去食晚餐  

就可以係度買少少食物返酒店房慢慢食   非常方便

我地仲試左焦糖布甸  小女子好怕過甜的焦糖   因太濃的焦糖會有啲苦澀  

至於呢個布甸~焦糖味唔太濃但奶味好香  完全合晒小女子的口味👏👏

日本的牛奶真係特別香  所以啲甜品都零捨好味

最後一日唔太趕住出去玩  我地試左Grand Cafe的buffet早餐

擺放食物的範圍相當廣  食物的種類亦很豐富

中、西、日、各類的麵包糕點、水果、甜品、雪糕、汽水、咖啡...   真係應有盡有

飽到上心口~~~果日連lunch都無食😝

食飽飽又未夠鐘check out  於是周圍行下散下步

酒店花園的櫻花

由花園旁的玻璃通道行過去酒店的Game Centre

可以夾下公仔  玩下推錢機  

 

請注意: 夾公仔機係使用100yen硬幣   而推錢機及其他遊戲係需要使用代幣

game centre裡面分別有換錢機及代幣兌換機   要睇清楚先好入張紙幣落去呀

如果唔係就好似我地咁要搵職員求救嫁喇~!!!😂

求救時   職員好似已經知道發生咩事   應該已經有不少人犯左一樣的錯誤...職員有晒經驗

Game Centre旁邊有間Studio俾小朋友扮下公主、卡通人物影造型相

交通方面:

酒店的1樓有開往JR舞滨駅的免費Shuttle Bus

星期六、日、及假期的班次比較密  差不多每個鐘頭有3班車

平日的班次比較少   若在平日乘搭就要夾好時間喇

除左有免費Shuttle Bus 去JR舞滨駅   酒店亦有分別去羽田空港及成田空港的機場巴士
 等候機場巴士的位置就在免費Shuttle Bus的後面
車費為成田空港: 大人 2450yen   小童 1230yen
        羽田空港: 大人 830yen   小童 420yen
 記住要到酒店的2樓lobby預先買票

我地到步當天就係直接由成田空港搭乘機場巴士到酒店

車程大約一個半鐘頭

Sheraton Grande Tokyo Bay Hotel 距離 Disney Resort line 的 Bayside station 只係大約3分鐘的路程

但住客亦可選擇搭乘往來酒店及Bayside station的Shuttle Bus

方便扶老攜幼及在迪士尼滿載而歸的住客

我地亦有乘搭過兩次  一係因為唔想冒著大雨行走  二係見到巴士剛在等候上客  無理由有車唔坐啫😁

Disney Resort line 的Shuttle Bus 當然唔會見唔到迪士尼的大主角米奇啦~

除左Shuttle Bus的車頭上面位置有隻米奇企左係上面(可留意右上幅相)    車身有米奇頭圖案的燈之外

車箱內都充滿著米奇  座位都係紅色的  但後面的座位係紅色的椅背上有米奇頭圖案   而前面的座位造型係米奇果條褲

扶手當然係米奇頭啦   門口都係  車箱最後位置的窗亦係   四面八方都被米奇包圍喇~
車程中車箱內仲會播放米奇同朋友仔們的對話  至於內容係咩野  小女子就唔知道喇  因為呢度的米奇想朋友係講日文既~~
只係短短的3分鐘車程已經令人好快樂😊   迪士尼的攻勢真係十分凌厲😬

在Sheraton Grande Tokyo Bay Hotel 一連3晚的住宿十分滿意  

房間舒適  景觀一流  食物高質數  服務貼心  配套完善  

若然再有機會去迪士尼  Sheraton Grande Tokyo Bay Hotel必然係小女子入住的首選

P.S. 強烈建議去迪士尼的朋友仔入住迪士尼園區的酒店
一來唔需要天都未光就起身從市區搭車入園  二來玩完整天唔洗拖著疲倦的身軀隨著人潮迫車返出市區
從樂園返回園區酒店只需要5至10分鐘  十分方便
小女子親身體驗選擇入住園區的酒店係明智之舉!!

🐠下一篇 -- 東京迪士尼海洋 出發!!!!!🐠
初訪東京。 尋找Duffy的國度。 Tokyo DisneySea。迪士尼海洋。遊玩心得分享(上)