2019 夏。令和元年の旅。関西北陸。闖進日本百選秘景。黑部峽谷鐵道

是次令和元年之旅的另一個重點行程--黑部峽谷鐵道🛤🌉

在金沢的三日兩夜加插左去呢個美麗的隱世景點

黑部峽谷鐵道係一條日本電力公司為左利用黑部川進行水力發電而運輸物資的鐵道, 依家係關西電力的子公司

呢條鐵道成為左觀光旅遊景點, 所以鐵道除左關西電力的員工們會搭乘之外, 仲有我地呢啲遊客

黑部峽谷鐵道全長20.1公里, 從宇奈月站到櫸平站, 單程大約用1小時20分鐘的時間由黑部峽谷鐵道小火車連接的日本第一深的V字峽谷⛰

沿途乘坐簡易小火車欣賞深深凹陷的險峻的峽谷, 感受大自然的美, 巡遊的使人感動的秘境

冬天的時候, 黑部峽谷鐵道係休息, 營業的芾期間係5月1 日至11月30日, 要注意啊~!!

我地從金沢出發, 搭乘北陸新幹線前往黑部宇奈月溫泉

新幹線はくかE7系列列車🚄

到達黑部宇奈月溫泉駅後, 就跟著指示尋找富山地方鐵道

行1分鐘左右, 其實係行過條馬路, 就會去到富山地方鐵道新黑部駅

留意時刻表~

富山地方鐵道係當地居民使用的交通, 而且乘客唔太多, 所以班次亦唔會太密

避免送車尾, 記住事先睇定列車的班次時間

由新黑部駅去宇奈月溫泉駅的票價

大人: 630yen, 小童: 320yen (不能使用IC卡)

基本上在新黑部駅搭富山地方鐵道的遊客都係前往黑部峽谷搭小火車~

上車時, 記住攞整理劵, 落車時就連同車費一齊交俾職員

到達富山地方鐵道的宇奈月溫泉駅後, 就步行去到黑部峽谷鐵道的宇奈月駅

兩個站其實好近, 大約行3分鐘就到喇~!!

就係呢度等小女子整理下交通:
1. 金沢 --> 黑部宇奈月溫泉 (北陸新幹線) (35分鐘左右)
2. 由黑部宇奈月溫泉駅步行去富山地方鐵道新黑部駅, 新黑部駅 --> 宇奈月溫泉駅 (富山地方鐵道) (30分鐘左右)
3. 宇奈月溫泉駅步行到黑部峽谷鐵道宇奈月駅, 搭乘小火車 (宇奈月駅 --> 櫸平駅)

小火車的票價都幾貴~~從宇奈月搭到櫸平要1980yen, 來回就3960yen

買車票的同時, 要選擇要坐那一款的列車, 列車係トロッコ列車(即係好似京都嵐山小火車咁~)總共有3款車, 每款車的票價亦唔一樣

第一款係トロッコ普通客車 ((在時刻表顯示:(普)): 唔需要另外加錢

トロッコ係完全無窗戶, 一路上可以無遮擋咁親近沿線的風景, 但若然遇到下落雨或冬天, 就會凍到不得了

第二款係特別客車 (在時刻表顯示:(特)): 需另加370yen

リラックス客車有窗戶, 窗戶可打開, 如果遇到乘客很多的時候, 走廊位置有間椅子可以拉出

第三款係リラックス客車 (在時刻表顯示:(R)): 需另加530yen

リラックス客車都係有窗戶, 窗戶亦可打開, 列車比前面2種都新, 椅子亦係最舒服, 而且可以回轉

每個時間出發的列車通常都有兩款列車可選擇, 可參考黑部峽谷鐵道時刻表, 查看列車的類型

黑部峽谷鐵道時刻表: https://www.kurotetu.co.jp/timetable/ 

亦可在網上預約車票:

https://www.torokko-yoyaku.com/en/?_ga=2.267570702.1049458274.1556085944-1588012622.1556085944

(建議: 若在旅遊旺季, 例如:紅葉季節, 最好先在網上預約車票)

去程的時候, 我地搭左最舒服的リラックス客車

買去程車票時, 職員都會建議一次過買好埋回程的車票~

整條黑部峽谷鐵道從宇奈月駅到櫸平駅有好多個站, 但遊客可以上下落的車站只有4個, 分別係宇奈月、黑薙、鐘釣、欅平

而其他車站: 柳橋、森石、笹平、出平、貓又、小屋平, 只係只俾關西電力的工作人員上落車

注意: 如果落車後再上車, 係需要重新買過另一張車票嫁~!! 所以我地就決定唔會在中途站落車, 會由宇奈月駅到櫸平駅, 再由櫸平駅返去宇奈月駅

講左咁耐, 開車啦~~~~!!!

列車離開宇奈月駅不久, 就會看見到呢座橋, 呢座橋叫"舊山彥橋"

以前的鐵道係行呢座舊橋的, 後來就興建左依家鐵路用緊的"新山彥橋", 舊橋就變成左行人步道

新柳河原發電所, 造型很似城堡咁~

當天的天氣十分好, 陽光普照, 在陽光的襯托下, 黑部峽谷的景致更美~!!!

到訪時係5月中, 山上仲隱約見到有積雪, 所以整程車都十分涼爽, 當列車入到隧道時, 仲有一點寒意~

經過左宇奈月溫泉的源頭--黑薙溫泉後, 就黎到後曳橋

沿線有不少介紹風景的牌子, 讓遊客可以知道接下來會看到咩野奇景

後曳橋係建在呢條鐵道最險峻的峽谷上的橋梁

後曳橋上可以見到傳統的引水管道--水路橋, 黑色的橋身很十分有復古氣息

笹平

之後就係出平水庫, 以發電為目的, 而且有排砂的功能 

出平水庫的上方就係出六峰

在隔離路軌回程中的小火車~

猫又

列車會在呢個站停留比較長的時間, 但係遊客唔可以在呢個站落車~

可能係因為電力公司的職員要在呢站落車工作~

好澎湃的川流~

之後就會黎到可以供遊客上落車的鐘釣站

與我地同列車的韓國大媽旅行團就在鐘釣站落車~

鐘釣最有名係溫泉, 大約步行20分鐘就去到河原天然足湯, 可以玩玩水,浸浸腳感受一下~

下午4時前都可以自由使用

待乘客上落後, 列車開動時會先往後退, 之後再往前走, 繼續前往終點站櫸平站

剛過左鍾釣站, 就會見到黑部的萬年雪
因山谷終年不容易有陽光直射, 所以從山上滑落的雪就逐年堆積就好似冰河咁

但萬年雪睇起黎唔多似雪, 啡啡黑黑咁, 似泥土多啲~
但其實係雪黎嫁~而且雪一直到夏天都仲有係度, 不過如遇到大雨的沖擊, 萬年雪堆積的雪量就無咁多~

小屋平水庫, 水庫當時正在放水~~

由宇奈月到櫸平共有10個站~

經過大約1小時20分鐘的車程, 終於到左櫸平站喇~~~~
其實沿路欣賞著風景, 影下相, 好快就到了~

櫸平站有手信店及小食店~

櫸平站附近的景點~
其中猿飛峽被指定為特別名勝‧特別天然紀念物, 猿飛峽係黑部川最狹窄的地方, 傳說猴子可以飛渡, 因此名叫作猿飛峽, 而車站内亦有不少標示以猴子為主角

但因時間的關係&有啲景點關閉中, 我地只行左附近的景點~
若要前往猿飛峽, 要預留好時間, 聽聞來回需時40分鐘~

唔知咩原因附近有好幾個景點都休業中~~
河原展望台(足湯)

猿飛山莊(餐廳)

從車站的展望台行落黎就到左紅色的奧鐘橋

如瀑布一樣宣洩而下的係祖母谷川, 川流就在呢度注入黑部川

黑部川的川流都流得幾急, 有啲好似會感覺到有啲水點打到臉上
而且呢度都幾大風, 我地在5月中到訪, 吹埋黎的風都幾清涼~, 要注意啊~!!

過左奧鐘橋, 就會見到一路旁有著工程安全帽可以自行取用, 為何??
但其實無咩遊客真係會使用~~~

再往前行幾步, 就係知名景點人喰岩
人喰岩並唔係天然所形成, 係由人工開鑿的山壁
山壁好似張開大口, 好似會將人食左咁, 所以得名為人喰岩

經過人喰岩, 沿著祖母谷川就係前往名劍溫泉的道路

我地無再繼續行, 決定回程, 影下無人的奧鐘橋

回到櫸平駅旁的展覽館, 裡面的壁報板上有附近景點的資訊
到訪的當天, 有好多的景點都休業中......

參考網址: https://www.kurotetu.co.jp/

我地搭乘11:04的列車由櫸平駅返去宇奈月駅~

回程的時候, 大家都無去程咁興奮, 多數都係在車上補眠休息, 因為去程及回程都係同一條鐵路, 所以沿途的風景都係一樣的~

涼涼的微風加上寧靜的車箱(因為大部分的乘客都在休息😜), 確實係幾好瞓既~

回程時搭乘的特別客車, 坐座椅比リラックス客車的硬, 無咁好坐~

トロッコ普通客車

一個鐘頭左右就回到宇奈月駅~

宇奈月駅內的土產手信店

離開車站後, 可靠左邊行去やまびこ展望台
從宇奈月駅行去展望台途中, 有個俾團體旅客拍照留念的梯架, 梯架上有黑部峽谷鐵道小火車列車的佈置

唔洗5分鐘, 就去到やまびこ展望台

在展望台上, 可以同時觀賞舊山彥橋與新山彥橋

比較近而顏色較深的就係剛才的地搭乘小火車經過的新橋

山彥係日文有解作回音的意思, 列車經過時所產生聲音十分響亮, 就連溫泉街都可以聽到

離開展望台後, 緊記要走落去呢條樓梯

站在舊山彥橋拍攝新山彥橋

舊山彥橋

正當我地要離開之際, 剛剛咁啱有小火車在新山彥橋駛過, 火車上的乘客仲同我地揮手打招呼呢~!!

溫馨提示: 呢個位置十分大風, 若有戴帽的話, 要小心帽會被吹走~

回到宇奈月駅

在宇奈月駅對面的黑部川電氣紀念館
裡頭介紹利用黑部川發電的建設歷史, 免費入場

富山地方鐵道的宇奈月溫泉駅出口外的噴水池, 池水係溫泉口黎嫁~

步行去宇奈月溫泉街~溫泉街唔太長, 亦唔太多店舖, 遊人亦唔多~~~~

位於溫泉街中間路段的"溫泉"

溫泉街唔太多野行~咁就去搵間餐廳坐底食個lunch+tea~其實都無咩餐廳選擇😓
好啦~但係竟然去到一間非常高質素咖啡店~!!

呢間咖啡店應該係由一對夫婦合力經營, 丈夫負責水吧, 沖咖啡, 製作甜品, 而太太就負責廚房~
每一個的餐具都好靚好有特色, 擺盤十分美, 好有心機~

所用的食材十分新鮮

甜品蛋糕都係自家製作~

餐廳的環境十分舒適, 好適合放空~~
餐廳內擺放左好多與莫札特及音樂有關的擺設, 相信店家應該係十分喜歡莫札特

無論係三文治、多士、沙律、甜品、蛋糕還是飲品都好美味, 食得出店主夫婦的用心及心意~

Cafe Mozart
一間用心經營的餐廳, 若大家去到宇奈月溫泉區, 不妨幫趁下丫~