2019 夏。令和元年の旅。大阪。黑門市場
喂喂喂~!!! 之前咪話過啲野越來越貴, 又越來越多人, 所以唔想再去既~~~但始終又係要去喎~~~哈!
身體永遠是誠實的~黎到大阪, 唔去大阪廚房黑門市場, 好似始終都差左少少, 個旅程好似有點缺失咁~~~~
以上純粹個人的感覺與見解
當然其實仲有好多市場可以去, 為何係都要黎黑門市場呢?? 以第一、兩次到訪大阪的遊客而言, 黑門市場係值得去既, 原因有二:
原因一: 黑門市場位置十分方便, 位於遊客的集中區域--難波心齋橋附近, 在黑門市場食完個豐富的早午餐, 就可以去難波心齋橋shopping~!!
原因二: 黑門市場係做遊客生意的, 市場內大部分都係食店, 刺身、壽司、海鮮丼、天婦羅、煎和牛、拉麵......, 仲有超級市場及土產手信店, 一個市場就已經可以滿足你
咁若已經到訪過大阪數次呢?? 其實可去可唔去, 近近地就去買下食下野咁囉~😆
從前的當地人市場, 已變成熱門的遊客景點, 雖然食物的價錢一次去比一次高, 但放眼望過去全部都係盡吸眼球的美食, 多多少少都會抵擋唔住引誘~~~~
林林總總的壽司、海鮮丼
各款的即燒海鮮~
市場當然緊係有媽媽們最愛的新鮮日本本地的水果
一場黎到都要食少少野既~😙
我地今次無去香港人的熱門食店黑門三平, 轉左去千成屋~
千成屋的食品種類比黑門三平的多元化: 和牛、長腳蟹、燒物、鍋物等等, 若同行有唔多食生野的朋友, 建議去千成屋, 生野熟野可以一齊食, 當然你可以食完呢間再食下一間既~
每次必去的萬野總本店
萬野總本店係食咩既呢?? 係食現燒和牛的
只有在櫥窗最上層的和牛可以即燒即食
時間係10:00-17:00
承惠2838yen, 咁就食左差唔多二百蚊港紙~~
(若兌換率係100yen=HK$7)
即場由店員為你烹調
食得lu~~~超juicy~~
再次提提大家: 要在店舖範圍或門口附近用餐完畢先好繼續逛呀~!!!
香港人最愛的黑門三平~
之前每次黎到黑門市場, 我地都必會幫趁, 但奈何人越來越多, 食品的價格又越來越貴~
今次無再入去~而且市場內仲有好多其他的選擇~
買藥妝唔單只可以在心齋橋購買, 黑門市場都有藥妝買嫁~
在黑門三平的正對面, 有間貨品擺放有點凌亂的藥妝店
呢間藥妝店產品的價格普遍比起其他的藥妝店便宜, 但就無得退稅, 同埋貨品種類比較少, 主要賣藥物
大家有興趣或時間比較充裕的話, 可以周圍搜求及格價一下~
.
黑門三平的斜對面就有間賣食品為主的超級市場黑門中川
門口擺放著各種的水果, 遊客自自然然就被吸引入內
其實黑門中川應係當地居民購買採購食品的店舖~
口裡說不, 但每次總會行一行過黎食下野, 買下土產手信~
都係因為情意結吧~, 每次去大阪都要黎一黎先安落~~😊
之前有關黑門市場的分享文章:
2018夏。 大阪 。 黑門市場。 口話貴但又要去
留言
張貼留言